KNP CHANCHIN
I. KNP hung kiphudaw dân:
Mizoram Presbyterian Church, Manipur Area ah Kochuam Numei Pawl hi Joint District chun (tu ah Manipur Area) a kivaihawmnau khat veina 10th – 13th October, 2002 (Vaihawmna General No. 8) in Christian Women Fellowship ti’n a la phudawku a hi. Joint District Khawmpi 3 veina 11th – 13th October, 2004 ah Lamka Kochuam Biak In ah vaihawmna General No. 3 na chun Christian Women Fellowship chuh Presbyterian Women Fellowship ti min vua kit a hi. September 16, 2010 (Ningani) Manipur Area Committee 27 veina Synod Conference Centre Committee Room, Aizawl ah thupukna No. 4na chun Presbyterian Women Fellowship chu Kochuam Numei Pawl (KNP) ti ah sân a la hi. Zia chu tu tiang hin mat a hi tai.
Puitu masa te:
Joint District Standing Committee 7 veina date 29th December, 2004 in a nuai ah te hi Numei Pawl te Office Bearers (2005 February tha PWF Khawmpi chan) ding in a la guatu a hi.
Chairman : Pi Phakhawlam, Lamka
Secretary : Pi Hatthiannei, Kangvai
Treasurer : Pi Nianghawiting, Lamka
Ex-officio : Administrative Secretary
2) Joint District Chairman & Secretary
Kikhawmpi masa pên: Kum 2002 ah Joint District Manipur Area in a la din hi ta maleh Numei Pawl te hin a chuam ah khawmpi mang thei ziang lo in a la um hi. Puitu ding ah Joint District Standing Committee in a la guat teu hin kum 2005 ah kikhawmpi mat theina ding in pan nasa tak ah hun la in, February 18th – 20th, 2005 in Numei Pawl te kikhawmpi masa pên chu Lamka Kochuam Biak In ah nuam tak in mat a la hi.
Pastor Bial hi a la tam naipua, Bial pagiat (8) a pat in khawmpi palai 90 vêl chiakhawm thei a hi. Kum 2005 kikhawmpi vâihawmna hin 2005 – 2006 puitu ding têlna nei a hia a nuai ah te hi têl tin te chu a hiu:
Chairman : Pi Lalrinmawii (Joint District Standing Committee guat)
w/o Rev. Lalchuanmawia, AS Joint District Manipur Area (a hun lai ah)
Vice Chairman : Pi Phakhawlam, Lamka
Secretary : Pi Hatthiannei, Kangvai
Asst. Secretary : Pi Ngaknu, Torbung
Treasurer : Pi Nianghawiting, Lamka
Finance Secretary : Pi Tailam, Lamka
KNP thiltupte:
KNP hin thiltup pawimaw ma ma pali a nei hi. Zia te chuh:
1. Kochuam pumpi nasepna subuting ding ah sepkhawm
2. Khristian Inkuan sudet ding ah sepkhawm
3. Panpi ngâite Khrista min ah panpi
4. Chanchinpha puanjâk
II. Kikaihuai dan tangpi:
Kikaihuaina ziksa dan siam um lo ah a pawimawte chu Committee in a la ngaitua jel sek chu Kochuam chia jel ding ah chun lemchânglo ding ah ngâi in, CKNP meeting 21 veina, 4th June, 2011 thupukna No. 5na dungzui in Mizoram Synod Kohhran Hmeichhiate kiang ah “Mizoram Presbyterian Kohhran Hmeichhia Inkaihruaina bu” Vaiphei pau ah le daw ding phalna dawt a la hin, Kohhran Hmeichhia te’n le dawtna chu ei phal piak in, Pi Hmari leh Rev. Biaksailova te’n tawmngai tak ah a hun ledawu Kikaihuaina Dan Bu chu 2013 kum in a kimang pan hi.
KNP Kikhawmpi Lian 9 veina 2015 thupukna 1na ah chun Kikaihuaina Dân Bu hi siam thak ding ah Manipur Area Committee ah dawt ding ti’n thupukna nei a hin, dawtna chu Manipur Area Committee 42:1(c) chun lemsa in a siam pha ding in Rev. Lalbiaknia, AS (a hun lai ah), Rev. S. Khaikhawlam, Rev. K. Neihsial leh Rev. Joseph Lalnunmawia te a guat ngal ua, a mausia’n ngaituana tam tak sêng ah Manipur Area tawh kimil ding ah a hun siamlemu kikaihuaina dân chu mang cha’n KNP te tu tiang hin a Kikaihuai a hi.
Nasepna hung khang jel in Kikaihuaina etphat pawimawna a hung um jel a, siamphat ngaite, belap ngaite, theng dang lam ngaite a um sek ziak in, CKNP Committee thupukna dungzui in kum 2017 leh 2018 in KNP Kikaihuaina dân hi Revised bawl a hi.
III. Nasepna Chiapi Dân:
KNP te’n nasepna pawimaw tak tak bang zat a hem a chiapi teu lak a langsar diak pani a um ah zia te chu- Khristian Sungkuan leh Anchangham nasep a hi.
1. Khristian sungkuan tungding ding ah pan lâk dân: I Kochuam sung ah sungkuan zosia te’n nisin ah insung kikhawpna I nei thei chiatna ding un KNP lawi upate’n pan la in, kum sin in “Khristian Sungkuan” ti thupi ah mang in Seminar/campaign leh sermon te haw a la chiapi zing ui. Nisin insung kikhawpna nei thei leh nei theilo report mumal tak ah kum 2008 a pat in Bial tin ah lâkkhawm thei a la hi. Insung kikhawp ma I sâwn dân uh:
Nisin ah insung kikhawpna nei thei inkuan zat: 200817.2 %
Open configuration options
Open configuration options
202125.9 %
Open configuration options
Open configuration options
2. Anchangham: Anchangham etkawl leh buaipi hi I Kochuam chun Numei Pawl te mawpuakna’n kawi hi. KNP in le mawpuakna a hi bân ah Anchangham nasepna hi pawimaw tak leh phachuam tak a hi ziak in ma a sâwn jêl theina ding in anchangham chungchâng in Seminar/campaign te Kochuam bik, Bial huap leh Area huap in guanggal a hi sek hi.
Anchangham din mun tena:
2008 2021
1. Anchangham ham thei zat 95.4 % 99 %
2. Anchangham Total Kg zat 27,217 2,38,10,015
IV. Pawimaw dang te:
KNP thupi – “Khrista Thuhiatpitu” (Nasepte 1:8)
Manipur Area ah KNP te hin thupi chuam chuam in thuzil kum khat dan in nei sek a hi.
Kikhawmpi kum khat dan ah nei a hia, khawmpi neilo kum leh vaihawm kikhawp nei a hi.
KNP in naupang 26 nu leh pa chawmtu ding neilo te class X a sim zaw tiangu a la chawp chu kum 2020 in Pathian panpina zâl in chawp zaw a hi tai.
KNP in kum 2014 a pat in semtu pakhat a la chawm in, 2020 in pakhat dang chawpbe in semtu pani chawp a hi. Chun, Bial ah le semtu chawm thei a kibe lep jel hi. D. Phailian Bial, Kangvai Bial leh Imphal Bial te hin semtu pani chiat a chawm thei ui. New Lamka Bial, S. Kawtlian Bial, Sugnu Bial, Lamka Bial, Mata Bial leh Leijangphai Bial te hin semtu khat chiat a chawm thei kit ui. (2020 Bial chanchin Report khaikhawm a pat)
‘Numei Ni’ hi Manipur Area Committee ei lemguat piakna dungzui in kum sin October tha Simhaini li vei (4th Friday) ah kum 2017 a pat in mat pat a hia. Kum sin ah thupi ding leh mat di dan tangpi hi Central Committee in hun guanggal in Kochuam mal/Bial huap ah mat zing a hi.
2020 report dungzui in Pastor Bial 21 a pat Bial chanchin report dawnna kipat in, Numei kum 14 chung mi 5,845 a ki um hi.
